unser Tracht

Was wird wann und wo ozogn und wia soi´s ausschaugn?

De Festtracht ziagt ma o:
– Bei kirchlichen Anlässen wia Fronleichnam, Priminz, Hochzeiten.
– Bei Vereinsanlässe wia Gaufest, Trachten- und Gründungsfeste.
– Ois Ortsverein bei Festa von de Ortsvereine
– Bei Trachtenwallfahrten und Beerdigungen von Vereinsmitgliedern (da trogn die Buam a lange Hosn, oder a Bundhosen, schwarze Krawattn, koan Huatschmuck, de Dirndln a schwarze Strumpfhosn, koan Huatschmuck, ohne Bleamen, blos mit Buchs oder Asparagus)

De Tanz-oder Plattlertracht ziagt ma o:
Bua und  Dirndl tragn des Gwand bei  öffentlichen Auftritten (beim Dirndl da Huat nach Absprache mit´n Vorplattler).

S´Ausgehgwand (Hoibtracht):
Des trogt da Bua zu sonstige Vereinszusammenkünfte wia Jahreshauptversammlung, Maibaumaufstellen, Maiandacht, sonstige Gau- und Gebietstermine (Gauversammlung, Vorplattlerprob, Gebietstreffen, usw.), Weihnachtsfeier, Bsuach von Brudervereinen, Grillfest, Ausflug (abends), Geburtstagsfeiern von aktiven Mitgliedern. S´Dirndl tragt s´Vereinsdirndl wenn möglich mit aufegsteckte Haar.

Dirndl Festtracht

Zur Dirndlfesttracht ghert amoi da Spenzer. De Ärmen san gsmogt und vorn mit weißer Spitzn unterlegt. Drauf kimmt da Vorstecker. Der is aus weißer Festonspitzn und wieder drauf kimmt des Miada. Des gibts in halbsteif oder steif, matt oder glänzad. Genaue Vorschriftn ham mia da ned. Zuagmacht is an da Seitn mit Hackln oder vorn überlappt. 5 paar Miadahackln san draufgnaht, de wern mit da Miadakettn verschnürt. Es kennan a Taler drohänga. Am End vo da Kettn is a Miadastecka. De Bleamen vorn am Ausschnitt san farblich abgstimmt zum Tüache, dazua an Buchs oder Asparagus. Aufm Vorstecker hat ma vorn in da Mitt a Broschn. De Fransn vom Schuitatüache san 3-fach knüpft, es werd genau so ogsteckt wia bei da Tanztracht. De Tuachnadl hint is suibern mit Oacheköpfal. S’Vereinszeichen kimmt auf die linke Vorderseitn aufe. Am Miada vorn de Bögerl wern a mit Oachenadln festgsteckt. Da Rock is da gleiche wia bei da Tanztracht, bloß länger und zwar 21 cm vom Bodn auffa. Dazua des rosa Schürzl, 3 cm kürzer wia da Rock, is mit am Reihbandl 5 cm greiht. In da Weitn hots 140 cm und geht um de hoibate Taille. Hint in da Mitt san de 8 cm broatn Bandl bundn. De Bandl san offat gsamt. Zur Festtracht tragt ma a weiße Strumpfhosn evt. handgstrickte weiße Strümpf und den Miesbacher schwarzn Spanganschuah.

De Haar san entweder zu ana Gretlfrisur hochgsteckt oder man hat a Pumperl (Knoten oder Zopfschopf). Suiberne Haarnadeln, net unbedingt mehra wia fünfe, a Haarspang in Goid oder suibern, um d’Gretlfrisur a gstickts Samatbandl war natürli a sche.

Ois Huat tragt des Dirndl an Miesbacher Dreherhuat aus Velour oder Filz, mit an weißn Adlerflam (Dirndlflam). Da Flam werd links oder hint tragn. Huatzeichn san höchstens 5 ogsteckt, net mehra.

A mehrreihige Hoiskettn in Suiba oder Granat gherat a no dazua. Stoana für´n Schmuck san aus Granat, Onyx, Türkis oder Calcenit. S´Suiber is hell.                         

S’Kerbe und a Regnschirm ghert no zur Tracht.

Dirndl Tanztracht

Des Dirndl hot a weiße Blusn mit Puffärmen o, eigfaßt mit weißer Spitzn, vorn eckat ausgschnittn und hint zum Spitz, daß mitm Miada genau zamm baßt. Des Miada is steif oder halbsteif, matt oder glänzend mit 5 paar Miadahackn, hint oan Rockhackn und auf da Seitn mit Hackln zuagmacht oder vorn überlappt. De Miadakettn (wia bei da Festtracht) hoit dann ois zamm. S’Schuitatuach is im Quadrat ungefähr 80 auf 80 cm. D’Fransn san 3-fach handknüpft, es werd zum Dreieck zammglegt, hint am Miada mit na Miadanadl ogsteckt, vorn grad zum Blusnausschnitt glegt und unterm Miada festgsteckt. S’Vereinszeichn kimmt links an da Seitn hi.
De Bleamen san farblich abgstimmt, a Buchs oder a Asparagus ghert dazua.
D’Haar wern zur Gretlfrisur hochgsteckt, vielleicht a paar suiberne Haarnadeln, a Samatbandl, glatt oder gstickt um de Zöpf  glegt und hint a Haarspang in suiber oder gold.
Da Huat is a Miesbacher Dreherhuat, aus Velour oder Filz, mit Adlerflam. Da Flam is hint ogsteckt oder links. Hechstens 5 Huatzeichn san dro.
Da Rock is a Dreherrock aus schwarzem Gabardin, 5 cm broat handgreiht und so weit, daß a beim Drahn wia a Teller außi fliagt, da Rand is dann 8 cm oba. Drunter is da Rock, bsetzt mit am rosa Stoff, wia d’Schürzln san und auf da Naht is a schwarz Satinbandl gnaht. D’Läng vom Rock is oa handbroat unterm Knia (is da Rock 70 cm lang, dann is a 4,50 m weit, +/- 1 bis 5 cm in da Weitn). S’Schürzl is rosa, 5 cm mit am Reihbandl greiht und 3 cm kürzer wia da Rock und is 140 cm broat. De 8 cm broatn Bandln , offat gsamt, san hint in da Mitt bundn. Drunta hat s’Dirndl an weißn Unterrock mit spitznabschluß o. Da Unterrock muaß so weit sei, daß da Rock beim Drahn trogn werd. A weiße Strumpfhosn mit Muster und drüber a Draherhosn wia aufm Buidl ghern natürli dazua. D’Schuah san scharze Haferlschua, wias Buam a habn. Hoiskettn, Haarnadeln, Miadastecka is gleich wia bei da Festtracht.

Buam Festtracht

Ois Huat ham de Buam an Scheibling aus Velour oder Filz. Huatschmuck is da
Adlerflaum in da suilbern Huisn. Am Huat is s’Vereinszeichen ogsteckt und höchstens no 4 andere, vom Preisplattln, oder von Festa. A Bleama und a Buchsasterl steckt se da Bua bei Festlichkeitn o.  S’Hemad (Pfoad) is baumwollan, weiß, hat an Liegekragn, Perlmutknöpf und in Bauchhöhn an Riegel, da kennan de erstn Buchstabn vom Nam eigstickt sei. Krawattn is rosa, wia da Tüachestoff vo de Dirndln (40×40 cm), zamghoitn wiads mit am boanan Schuber.  S’Schmieserl geht a. Motive: Münzn oder Hirschkopf. S’Leibe is aus an grean Tuach, hintn schwarze Seidn , de 
grodn Taschn san rot paspelliert. A silbers Kettal hoit an Kragnausschnitt zamm. A Uhr mit Uhrkettn (Goid oder Silber, je nach Reichtum) oder a Talerkettn ko ma a no tragn.   D’Lederhosn, de kurz, des   wichtigste Stück von am Trachtler, is sche   handgstickt. De Blattstickerei, so nennt ma des, is moosgrea.

Jetz ghern no d’Strümpf und d’Schuah dazua. Es san handgstrickte          Umschlagstrümpf  in silbagrau mit Umschlag und grea gstickt. Ois Schuah ham mia an schwarzn Haferlschuah zwiegnaht.

 

De Hosnträger san schwarz aus Leder, da Steg  is gstickt, in da Mitt des Reischacher Wappn und links und rechts a Büsche mit an Edelweiß, an Enzian und an rotn Almrausch. De Joppn is  grea, ganz genau forstgrün, beim Stoff  is des beste a Kerntuach, a Zwoareiher. Knepf san aus Hirschhorn, am Revers is a Oachblattl ois Applikation aufgnaht, drauf vielleicht a Hirschhorn, bsunders sche gschnitzt. Wia d’Ärmen und da Buckl gnaht san, sehgt ma am Buidl genau.Ehrenzeichn steckt ma am Revers fest. A Bua hat bei seiner Tracht no a lange Hosn. De braucht er bei Beerdigungen, Gedächtniswallfahrt, einfach  für ernstere Anläss. A de ältern Manna tragn oft a lange Hosn. De lang Hosn is an de Aussnseitn grea paspelliert, da Stoff is wia da Joppnstoff. Des öftern hat da Bua in da koitn Jahreszeit a a Bundhosn o. De Bundhosn is net unbedingt Bestandteil vo da Tracht, aber es is net schlecht, wenn oana oane hat. De Bundhosn is  a schwarz, wia de kurz, blos weiss gstickt. De ghert a zur Hoibtracht. Bei Traueranlässn konns da Bua a tragn, wenn er koa lange Hosn hat.Bei da Hoibtracht, des is sozusagn s’Werktagwand, wenn da Bua aufnacht fuat geht, zum Vereinsabend oder zur Plattlaprob, hot er net an Scheibling auf, sondern an Spitzhuat mit na Spuihahnfedern oder vielleicht an Gamsbart, oder a gar koan Huatschmuck.

Da Bua hot beim Plattln a weiß Hemad mit Liegekragn o, vorn des Schmieserl ogsteckt, d’Ärmen aufgrempet, Plattlerhosn is knialang, Umschlagstrümpf (des Muster muaß net gleich sei), mit Plattlerschua und an Ranzn oder s’Leibe. Wenn in da Gruppn plattlt werd, dann sans gleich ozogn, entweder alle mit Ranzn oder alle mit Leibe. Da Huat is da gleich wia bei da Festtracht  und zwar da  Miesbacher Scheibling.

Kindertracht

Buam:
De Tracht vo de Kinder unterscheid se net vo de Großn.
Sie habn blos bis jetzt koa Leibe und koan Ranzn und a koa Bundhosn. Ois lange Hosn hams eigentlich a schwarze Hosn und zwar a Stoffhosn aus Tuach, (net aus Jeansstoff). D’Joppn is genau so a Zwoareiher und bis jetz habn de kloan a no an Spitzhuat.

Dirndln:
Dirndl habm koa Mieder, sondern a ganz Dirndlgwand, da is aber da Rock greiht wia bei de Großn und a so weit, daß a aufidraht. Am Oberteil san mindestens 3 paar Miederhakn, (je nach Größ vo de Dirndln), da is a Kettal umigspannt. An de Schultatüachen sand Maschinenfransn ognaht und d’Haar werdn ois Zöpf tragn mit rosa Bandln. S’Hoiskettl is a schwarz gstickts Samtbandl.
Wenns ois Jugend auftretn, werdn  d’Haar ois Gretlfrisur tragn wie bei de Großn.

Alttracht